أحب أقول (وبافتخار) إني من المواطنين المطحونين اللي بيركبوا الاختراعات اللي في رأى الشباب الـ"كووول" اختراعات بيئة. اختراعات زى الميكروباص، المترو، الأوتوبيس وليا معاها تجارب كتيرة. وكان ليا تجربة واحدة (ومش عايزها تتكرر) مع الاختراع التايلندي الأصل .. التوك توك.
شاءت الأقدار إني أركب ميكروباص من يومين من ميدان العباسية كما شاءت الأقدار إنها تبقى زحمة بشكل خانق وشاءت كمان إن طريق جسر السويس (بالقاهرة) اللي بروح منه يبقى أحد لعنات الله على الأرض. وكل ده.. برضو من يومين!
ومش هى دي المشكلة أنا متعود على كده ومش عايز أتكلم في مشاكل المواصلات العامة أصلاً لكن هتكلم عن أفعال بتحصل من فئة معينة على الخصوص وهى الجنس الناعم أو النسواااااان والكبار منهم على الأخص.
الموقف اللي حصل بالضبط إن العبد لله كان عايز يركب الميكروباص الزحمة (حتى ولو شعبطة هعمل إيه مروحش يعني؟؟)
الناس متبعاني. ده انا حتى سامع تشجيع وهتاف من ورايا و تحديداً من ست كبيرة أوي واقفة ورايا بالضبط وكانت بتقول بالنص "يلا بسرعة، هتلحق، نطططط"
وخلاص الكرسي قدامي بينادي عليا وحلمي أخيراً هيتحقق و ألاقي مشجعة مصر الأولى بقيت مصارعة مصر الأولى و هبدتني أجدعها كتف ولا بتوع السومو ونطت مكاني في الكرسي! أسميها إيه دي؟ سماجة؟
مع إنها لو كانت قالتلي يا ابني انا عايزه الكرسي عشان تعبانة ولا حاجة كنت انا اللي بلطجت على الميكروباص عشان تركب هي ومن غير تعب.
أنا بس بعترض على الأسلوب! نفس أسلوب الإبتزاز اللي بتتبعه الستات الكبيرة في المترو بس مش إبتزاز جسدي بقى لا إبتزاز عاطفي وضغط نفسي.
في المترو هنشوف التمييز الإيجابي لصالح الستات بتخصيص عربيتين ليهم (الرابعة و الخامسة) طوال اليوم وواحدة لحد الساعة 9 مساءاً فقط واللي يركبها من الرجالة يدفع غرامة 10 جنيه. حلو جداً الكلام ده عشان الستات متدخلش بشياطينها وتوسوس للرجالة وتحصل قلة أدب.
في المترو لو ربنا رزقك وقعدت قدام واحدة لازم تلوح رقبتك 90 درجة عشان متبصش ليها وهى تقعد تعض في شفايفها وتقول الحيوان ده بيبص على إيه؟ متخافش رقبتك هتتعدل بسرعة ولنفس السبب بس وانت واقف! عشان هتجيلك واحدة ست وتبصلك بصة "لو إنت متربي تقوم وتقعدني"
أنا مش بعترض على الموضوع ككل. ده زوق والمفروض إنه يحصل. (أنا أصلاً مبحبش القعاد في المواصلات العامة عشان بنام فيها و النوم عورة وبلاش فضايح) لكن أنا بعترض بقى على الناس اللي تأخده أمر مسلم بيه وحق مكتسب!
يعني لو انت في يوم تعبان ومش قادر تقف هتجيلك برضو واحدة تقف جنبك وتبصلك بصة "بص الواد اللي مش متربي قاعد وانا واقفة" ولو هي ست كبيرة شوية هتلاقيها بدأت في وصلة كلام عن الجيل المهبب اللي مبقاش يحترم حد عشان لو مقمتش من البصة إياها هتقوم من الكلام حفاظاً على سمعة وماء وجه جيلك . قمت وقعدتها وأنقذت سمعة الجيل هتقابلك بقى كل الحاجات اللي بتشتكي منها الستات في العربيات المختلطة بس من الستات نفسها يعني مثلاً لو واقف جنب واحدة لازم وحتماً تسيب حيز فراغ كبير حواليها حتى لو المترو زحمة وتقعد تعمل إنحناءات غريبة بجسمك ولا راقصات الباليه عشان لو معملتش كده ولمستها غصب عنك مع إهتزازات المترو العشوائية هتعملك فضيحة وتحصل بكل فخر على لقب "متحرش".
و الستات دي بتتبع الأسلوب ده معانا عشان عارفة إنها لو ركبت عربية السيدات و إتشقلبت في مكانها محدش هيعبرها.
بصوا انتوا اللي عايزين المساواة صح؟ طيب أنا من حقي إن محدش يبتزني عاطفياً ويقومني من مكاني زي اللي حصل من يومين معايا.
خلاص نعمل عربية للرجالة بس و الستات تيجي بشياطينها متلاقيش حد. يا نعمل المترو كله مختلط ونعمل عربيتين للشياطين!
ليست هناك تعليقات:
إرسال تعليق