جاءت هذه التدوينة متأخرة ولكن توجب على كتابتها فقمت كتابتها على عجل. ومع اني منذ مدة كبيرة لم اكتب شئ وعندما اكتب اقوم بعمل دراسة وليس هجوم. دراسة من وجهة نطري المتواضعة على قرار الاستهلاك العادل لمستخدمي الانترنت في مصر واعذروني سوف اتحدث في هذه التدوينة باللغة العامية المصرية.
اللي ميعرفش القرار ده فا انا هشرحه بسرعة وايجاز القرار ده تم تطبيقه على مستخدمي الانترنت في مصر وهو تحديد كمية البيانات اللي بيتم تبادلها على الشبكة العنكبوتية بمقدار معين.
انا مش برفض القرار بشكل كامل لكن ده مش معناه اني موافق عليه لاني مش موافق عليه وتيجي البروبجندا الاعلامية الكبيرة اللي بشوفها كل يوم في التليفزيون (وحاسبلي على مرارتك يا صغيري) تقولك انت بتاخد واحد ميجا بايت وده تلاعب بالألفاظ لأننا تقنياً الميجا بايت اللي بيتكلموا عنها دي في الحقيقة هي ميجا بيت وفي فرق كبير بين الألف والياء !! في فرق 1024 يا عزيزي المستهلك ولو انت مش عارف اديك عرفت اهوه.
القرار في حد ذاته هيغير من طبيعة المستهلك لأن للأسف (في نظري) 70% من مستخدمي الإنترنت في مصر إستخدامهم بينحصر في تحميل الافلام الموسيقي الخ الخ الخ بمعنى اخر استخدامهم بينحصر في تحميل المحتوى المرئي والسمعي المسروق والغير شرعي ويزيد ويغطي الافلام اياها اللي انا وانت عارفينها كويس (افلام ايه من اللي قلبك يحبها)
دي حجتهم وعشان ماخدش حق غيري في خدمة احسن
لا لا لا .. هنا بقى لازم يبقي في وقفة
هو عشان معاليكم مكسلين تحسنوا الخدمة يبقى تقولوا احنا بنعمل كده عشان الخدمة تبقى كويسة ؟
الخدمة طول عمرها متنيلة بستين الف نيلة وراضيين بالهم وساكتين وبندفع كتير وناخد قليل لكن تيجي يا معلم عايز تأكلني الايس كريم في الشتا لا صعبة دي شوية أصل أنا مش يضحك عليا أنا برضه بفهم أنت متجيش تحاول تقنعني أن أنت عايز تخليني أبقى بستخدم الانترنت في حاجة مفيدة بإنك تجبرني على حاجة معينة لا ده كده في تمييز ايجابي لصالح شركات الإنترنت على حساب ناس تانيه بتستخدم الدونلود او التحميل في حاجة مفيدة
التفكير الصح بقى هو أنك تحاول تغير فكر أبناء بلدك وتعرفهم بأن الانترنت مش للأفلام و الأغاني مش تقولهم الإنترنت مش للأغاني والأفلام وعشان أنتم بهايم وعايزيين نعلمكم الأدب يبقى مفيش إنترنت زي زمان وعاجبكم عاجبكم مش عاجبكم شدوا في حواجبكم.
نرجع بقى لحتة التمييز الإيجابي لصالح شركات الانترنت القرار ده بيخدمهم ازاى ؟؟
ببساطة شديدة الخدمة زي الزفت أنا متفق مع الكل يبقى الحل لتحسين الخدمة يبقى من عند الشركة مش من عند المستخدم. وهو في "اوروبا والدول المتقدمة" عشان يطوروا الانترنت خنقوا على المستخدم ؟ لأ طوروا في خدمتهم عشان توصل بشكل أحسن للمستهلك. عمرك سمعت عن اختناقات في الشبكة في بلاد بره بسبب رفع وتنزيل الملفات ؟ خلينا نفكر صح وننضف بقى !!
انا عن نفسي القرار مش فارق معايا في حاجة انا عندي إنترنت مخصوص والمساحة اللي محددنهالي مكفياني والحمد لله لأني مش بهتم بالألعاب أوي ومش بتفرج على أفلام من أصله بس يا جماعة أنا فرد ولما تعملوا حاجة حتى ولو كانت مريحاني انا بس دوناً عن الشريحة العامة للمستهلكين يبقى حرام. والله حرام.
وأه.. طول عمري بحب أقول اللي ليا واللي عليا ولو شايف حاجة غلط من أى طرف لازم أوضحها. أنا مش شايف الضجة اللي عملتها الجزيرة عشان المدونين. لأ سوري الحق يُقال المدون مش بيتحدد حركته بالموضوع ده لأنه مش مهتم بالتحميل لأ كلامه في دماغه و الكلام يا جماعة لو كتاب كامل 500 صفحة مش هيعمله 6 ولا 7 ميجا يبقى بلاش ندخل ده في ده و نقول الحركة دي معموله عشان يخنقوا أكتر على المدونين كده انتم بتمسكوا في البردعة وبتسيبوا الحمار. بمعنى اشيك عشان انا عارف ان الناس بتموت في الأنعرة زى عنيها انتم كده بتسيبوا السبب الحقيقي وبتمسكوا في حاجة تانية صغيرة وتافهة.
ويجي يقولك يوم 10 أغسطس يوم إحتجاج رسمي على الموضوع ده يمكن نعرف نصلح حاجة طيب اهوه 10 أغسطس فات و القرار لسه شغال وساري ومحصلش اي حاجة. يبقى كلمني عن الاحتجاج يا سيّدب الفاضل !!
الكلام الصح اللي يتعمل مش يبقى إحتجاج لأ يبقى حل بجد يحل المشكلة مثلاً زى البهوات اللي إحنا بندخلهم البرلمان بالتصويت وبيشتروا الصوت الواحد بـ10 و20 وساعات 50 جنيه يتكلموا مهو صوتهم بس هو اللي بيتسمع ولا إيه ؟
أنا كده قلت اللي عندي واللي عنده كلام تاني يقولي عشان أنا دايماً بقول رأيي خطأ يحتمل الصواب ورأى غيري خطأ يحتمل الصواب.
روابط اخرى بخصوص الموضوع:
الحمد لله أني قدرت أكمل قراءة التدوينة وفهمت ما فيها
ردحذفالقرار ده مش غريب عليا، وبما أنك تكلمت عن أروبا والدول المتقدمة راح أعطيك مثال حقيقي،
مثلا أنا في البيت، عندي 40 ميغا، وواضعين ضوابط لاستعمالها،
مثل عدم رفع أو تحميل أي ملف صوتي لألبوم موسيقي (وهذا طبعا يخص أغانيهم الأجنبية)
عدم رفع أو تحميل أي فلم (وذا أيضا من أفلامهم) يعني أنا أحمل الأفلام المصرية مثل ما أريد
وفي حالة تجاوزت الحدود ديه، يرسل لك إنذار على طول من أول مخالفة، وإذا خالفت الشروط مرة ثانية يتم اقصائك من هذا الاشتراك، وتصبح مشترك بالساعات أو بالسرعة، مثلا 200 ميغا في الشهر، أو 30 ساعة في الشهر. وإذا أعدت مخالفة القانون مرة ثالثة على هذا الاشتراك، يتم منعك من توصيل أي خط انترنت الى بيتك أو باسمك لمدة تفصل فيها المحكمة، وعادة لا تتجاوز سنة لأن الشعب هنا لا يستطيع التنفس بدون انترنت.
هذه مشاركتي أرجو تقبلها.
تحياتي. :wink:
اهلاً اخي يونس ولكن القرار له علاقة بحرية الملكية الفكرية
ردحذفبمعنى اخر عندما يقومون بهذا الاجراء حتى يحفظون هذه الحقوق ولكن ما حدث هنا انها كانت حجة
حق يُراد به باطل فكما قلت هو تمييز ايجابي بحت لصالح الشركات على حساب المستخدم.
وعذراً على استخدامي اللهجة العامية المصرية ولكني قمت بكتابتها على عجل فآثرت ان تكون بالعامية حتى اضمن خلوها من الأخطاء فعلى كل حال فداحة الخطأ في العامية اقل من الخطأ في لغتنا الأصلية ..
كالعادة يونس شرف مدونتي بتعليقه هذا شئ أفتخر به :$