ومين طبعاً Geek العائلة المصونة المتاح على طول!؟ لأ مش طارق محمد كامل. بالضبط كده هو مفيش غيره.. اسم النبي حارسه وصاينه أنا :mrgreen:
المشكلة إني في الفترة اللي فاتت كنت مشغول جداً و بالتالي مفيش فرصة إني أنفذ طلب العائلة و ألقي نظرة على الجهاز (المغفور له بإذن الله) لذا تم اللجوء لأحد مراكز الصيانة واللي عادة موظفينها بيبقوا خريجي أى حاجة من أى حتة وساعات مبيبقاش خريج أصلاً! هو بس ربنا فتحها عليه و بقى يعرف يوصل هارد وينزل نسخة ويندوز تحت شعار حافظ مش فاهم :upset: وفي مصر لو عرفت الحاجتين دول أحب أبشرك و أقولك مبروك بقيت في نظر الناس مهندس صيانة قد الدنيا.
و نزل فرمان ملكي من العائلة بما إني مصلحتوش يبقى أشرف على عملية الإصلاح المنزلية. فا.. ناهيكم عن الأخطاء الكتيرة اللي البيه الباشمهندز إرتكبها قدامي ومفتحتش بقى و اللي أثبتت إن شبشب حمام البيه هيعرف يعامل الجهاز أحسن من كده و بعد عدة محاولات لرج الجهاز (على غرار رأينا في المواتير الألمانية اللي مش بتتصلح إلا بالرج أو الدق عليها) قالي الجملة المعهودة:
معلش يا برنس هاخد معايا الجهاز عشان افحصه في مركز الصيانة بشكل أحسن من كده
ومع إنه معملش أى نوع من الإختبارات الأولية لفحص المشكلة إلا إني سكت وسبته يعمل اللي هو شايفه أصح.. عشان ميجيش حد يقولي (ده باشمهندس قد الدنيا يا عم إنت هيعرف يصلح اللي انت معرفتش تصلحه)
بس جملته دي بتعني إن البيه معرفش يحل المشكلة و هيروح بيه و يجمع كل صحابه الباشمهنزين عشان يعرض عليهم القتيل ولو برضو المشكلة لم تُحل هيجربوا يستبدلوا كل حتة في الجهاز ويجربوا يشغلوه عشان يعرفوا مكان العيب فين! ولما يعرفوا هيغيروه وخلاص و الزبون يكع دم قلبه بعد ما يسمع: والله المشكلة كانت من البروسزار (Processor) عامل شورت كاتس (Shortcut) مع بطارية الساعة فغيرت كابلات الداتا بتاعة الهارد.
المشكلة بقى إنه فكرني بحاجة كنت بحاول أنساها وهى إن الشعب المصري فيه نوعية كده من البشر أخدت على عاتقها صيانة سمعة الشعب المصري و الحفاظ على لقبه بإنه شعب جبار ولا يعرف الهزيمة و يموت في الإنتصار. و بالتالي عمره ما يقولك معرفش، هو بس بيعبر عنها بتعبيرات البلاهة على وجهه و في الوقت ده هو بيبقى بيحاول يدور في دماغه على إجابة يقنعك بيها. حتى لو كان لا يفقه شيئ في الموضوع ده أصلاً.
المثل بيقولك اللي يسأل ميتهوش لكن في مصر و بوجود أفراد من نوعية (أنا عارف كل حاجة وعيب أقول معرفش) هتوه وتلاقي نفسك بقيت في كسفريت. مع إنك أصلاً متعرفش فين كسفريت دي في بلدك بس هتروحها لو سألت أى حد ماشي في الشارع.
يا جماعة المعرفة دي شيئ نسبي ومش عيب إنك تقول معرفش. الحمد لله أفتخر إني بقول معرفش كتير ودي بتديني حافز إني أعرف عن الحاجة دي عشان ميجيش يوم و أقول تاني فيه "معرفش"
أختم مع فيديو لصحفي المفروض انه عارف كل حاجة في كل حاجة وهو مثال حقيقي للنوعية اللي بتكلم عليها
ليست هناك تعليقات:
إرسال تعليق