مصر بتتندم بينا : فقر إيه ده يا محمود!

تحذير هام جداً جداً: التدوينه القادمة تدعو إلى التفاؤل فلو كنت من المتشائمين.. كمل برضو يمكن تقرا حاجة تفيدك. ودي كانت المفروض تدوينه كاملة لكن قسمتها على أجزاء قصيرة تحت عنوان "مصر بتتندم بينا" من الندامة يعني. وده عشان متعبكوش معايا والتعليقات متبقاش متر ونص لكل تعليق (الناس هتقرا إيه ولا إيه) كما إنه من غير المستبعد إني أكتب في السلسلة دي تدوينات أزيد في المستقبل عشان دي تدوينات إرتجالية لحظية مصرية.
وده الجزء الأول منها

فقر إيه ده يا محمود!

مين قال إن مصر فيها أكتر من 60% تحت خط الفقر!؟ تفائلوا يا جماعة البلد زى الفل الشغل مغرق الدنيا و البطالة تكاد تكون منعدمة و العاطل بياخد شيئ وشويات من الحكومة كل شهر عشان ميمدش ايده للحرام او لشنطة طنط روحية في المترو (الاتنين حرام على حد سواء) و الناس كلها مبتسمة و رغيف العيش بقى قااااااااااااااااااد الطبلية. طب والدنيا ربيع و الجو بديع قافلي على كل المواضيع قفل قفل قفل قفل!
طبعاً مع صدور قرار بعلاوات على المرتب قيمتها 10% زادت الضرائب عشان تقدملك البلد رسالة واضحة وصريحة إن ما تعطيه حكومتك باليسار ستأخذ منك أضعافه باليمين (عشان البركة وقيمة اللي اتاخد منك متتعفرتش).
مين قال إن البلد في حالة تدهور و المقاصة عمالة ترتفع وتعلى وترتفع وتعلى لحد مبقناش عارفين هى رايحة فين! واللي معهوش فلوس عنده البرنامج الشهير لعبة الست... ياخد منه فلوس واللي مش قادر يروح، يتصل وبرضو هياخد نص فلوس الحلقة.
يا جماعة الناس دي معاها فلوس كتيرة ونفسها توزعها ده حتى شوفوا دي صورة من فاتورة تأجير معدات لمدة 9 أيام بس ودفعوا فيها تمن عربية محترمة و أهم حاجة السناك بوكس يعني الفلوس بالعبيط!
فين الفقر ده بقى؟ ده لما سألنا الكلاب كترت في الشوارع ليه ومبقيتش عارف أنزل أصلي الفجر في الجامع كانت الإجابة من مسئول رفيع (يعني خاسس شغلوا دماغكم) إن الكلاب و القطط كتروا عشان الزبالة كترت يعني الناس معاها فلوس وعماله تاكل زي البهايم. يبقى مين بس اللي قال إن عندنا حالة فقر لا دي الفلوس بتتنطور يمين وشمال!