مصر بتتندم بينا هى تدوينات إرتجالية لحظية مصرية. والنهاردة هتكلم عن بداية الندامة جت منين!
طب منين مصر بتتندم مش بتتقدم بينا؟
في البداية كان إسم التدوينة الطويلة "عمار يا مصر" وبعد كده فكرت.. هو مش مصر هى إحنا برضو؟ ولو فيها حاجة مش عجبانا يبقى إحنا سببها برضو؟
وتزامن التفكير مع شعارات "مصر بتتقدم بينا" واللي هو شعار من إحدى حملات الحزب الوطني الديموقراطي أوي.
أما بقى عن إستبدال القاف بالنون في 'بتتقدم' لتصبح 'بتتندم' فا ده إقتباس صريح من كتاب أدبي ساخر اسمه "الطبعة الحداشر" لكاتبه عصام منصور ~ واللي قرأت له الكتاب ده مؤخراً. بصراحة عجبني الاسم ولقيته مناسب جداً وقررت إستخدامه.
لأن زى ما قلت مصر هى إحنا، بس الوضع الراهن بيقول إننا أكيد داخلين على أيام سودااااااا - و إحنا اللي عملنا في نفسنا كده. يبقى بلاش نقول مصر بتتقدم لأن من الواضح اننا فاهمين التقدم غلط و النتيجة طالعه عكسية بشكل مش معقول.
والسلسلة دي مش هتخلص وهتفضل شغالة طول ما السلبيات موجوة. و بإيدينا بس هنحقق تغيير مصر. مش تغيير البرادعي ولا تغيير الحزب الوطني الديموقراطي أوي!
أموت و أعرف يعني قلدتوا الشعار وقلنا ماشي، لكن بلاش نظام حافظ مش فاهم ده! تغيير إيه اللي هينتج عن إنتقال السلطة من إيد واحد تابع للحزب الحاكم لإيد واحد تاني بيتفق في المفاهيم ونفس سُبل الإدارة وبرضو تابع لنفس الحزب الحاكم!؟
إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ
أنا بدعو كل فرد عاقل فاهم وشايف سلبيات في بلده إنه يكتب عن السلبيات دي من وجهة نظره طبعاً ~ تحت شعار مصر ببتندم بينا ~ ويبعتلي ويقولي على موضوعه عشان أقراه و أضيف رابط لكلامه هنا تبع السلسلة اللي كتبها شعب مصر مش أحمد حمودة بس! (يلا إعلان ببلاش أهوه) :P
ليست هناك تعليقات:
إرسال تعليق